بکریاں بھی ‘گرین بس’ کے مزے لینے لگیں، ویڈیو وائرل

امریکی ریاست اوریگون کے شہر پورٹ لینڈ میں ایک انتہائی دلچسپ اور انوکھا واقعہ پیش آیا ہے، جہاں دو آوارہ بکریاں گھومتے گھومتے بس اسٹیشن پہنچ گئیں اور وہاں کھڑی ایک پبلک بس میں سوار ہو گئیں۔ مقامی ٹرانسپورٹ اتھارٹی کو 911 پر اطلاع ملی کہ ڈویژن اسٹریٹ کے بس اسٹیشن پر دو بکریاں آزادانہ گھوم رہی ہیں۔ سی سی ٹی وی (CCTV) فوٹیج میں دیکھا جا سکتا ہے کہ دونوں بکریاں بڑے آرام و اطمینان سے اسٹیشن میں داخل ہوئیں، کچھ دیر بس کے اندر کا جائزہ لیا اور پھر نیچے اتر کر قریب واقع ایک شاپنگ سینٹر کی طرف نکل گئیں۔

اطلاع ملتے ہی پولیس نے فوری طور پر علاقے میں بکریوں کی تلاش شروع کر دی، تاہم وہ غائب ہو چکی تھیں اور ان کا کوئی سراغ نہ مل سکا۔ اس مزاحیہ واقعے پر ٹرانسپورٹ اتھارٹی نے اپنے دلچسپ تبصرے میں کہا کہ یہ بکریاں کہاں سے آئی تھیں، کہاں جا رہی تھیں اور کیا ان کے پاس سفر کے لیے درست ٹکٹ تھا، ایسے کچھ سوالات کے جواب شاید اب کبھی نہ مل سکیں۔