مریم نواز شریف میڈیکل کالج میانوالی کو باقاعدہ میڈیکل انسٹی ٹیوشن کا درجہ مل گیا

گورنر پنجاب نے پنجاب میڈیکل اینڈ ہیلتھ انسٹی ٹیوشنز ایکٹ 2003ء کے تحت مریم نواز شریف میڈیکل کالج میانوالی کو باقاعدہ میڈیکل انسٹی ٹیوشن کا درجہ دینے کی منظوری دے دی ہے، جس کے بعد محکمہ سپیشلائزڈ ہیلتھ کیئر اینڈ میڈیکل ایجوکیشن نے 15 اگست 2026ء کو اس کا باضابطہ نوٹیفکیشن جاری کر دیا۔ اس قانون کے فوری اطلاق کے ساتھ ہی ڈسٹرکٹ ہیڈ کوارٹر (DHQ) ہسپتال میانوالی کو کالج کے ساتھ بطور اٹیچڈ ہسپتال منسلک کر دیا گیا ہے۔ صوبائی کابینہ کی منظوری سے دونوں اداروں کے انتظامی امور چلانے کے لیے 6 رکنی ایڈمنسٹریشن کمیٹی تشکیل دی گئی ہے جس میں سیکرٹری خزانہ پنجاب، کمشنر سرگودھا ڈویژن، ڈپٹی کمشنر میانوالی اور پرنسپل مریم نواز شریف میڈیکل کالج سمیت دیگر متعلقہ حکام شامل ہیں۔ باقاعدہ بورڈ آف مینجمنٹ کے قیام تک یہ ایڈمنسٹریشن کمیٹی ہی تمام اختیارات اور انتظامی امور کی نگرانی سنبھالے گی، جس سے علاقے میں طبی تعلیم اور صحت کی سہولیات کا ادارہ جاتی ڈھانچہ مکمل ہو گیا ہے۔