مگرمچھ کا تیراک خاتون پر خوفناک حملہ، بازو کاٹنا پڑا

امریکی ریاست فلوریڈا کی مارین کاؤنٹی میں واقع سلور ریور میں تیراکی کے دوران ایک خطرناک حادثہ پیش آیا، جہاں 9 فٹ سے زائد لمبے مگرمچھ کے اچانک حملے میں ایک خاتون شدید زخمی ہو گئیں اور طبی امداد کے دوران ان کا دایاں بازو جسم سے جدا کرنا پڑا۔ عینی شاہدین کے مطابق تیراکوں کے ایک گروپ کے ساتھ موجود خاتون نے مگرمچھ کو قریب آتے دیکھ کر پیڈل بورڈ کے پیڈل سے اسے پیچھے دھکیلنے کی کوشش کی، تاہم خوفناک جانور نے اچانک حملہ کر کے انہیں پانی کے نیچے کھینچ لیا۔ پاس سے گزرنے والے کشتی سواروں نے خاتون کی چیخیں سن کر فوری طور پر پانی میں چھلانگ لگائی اور جدوجہد کے بعد انہیں مگرمچھ کے چنگل سے چھڑایا۔ نجات دہندگان نے موقع پر ہی رسی سے زخم کو کس کر باندھ کر زیادہ خون بہنے سے روکا اور بوٹ ریمپ تک پہنچایا، جہاں سے ہنگامی طبی امداد کے بعد انہیں ہسپتال منتقل کر دیا گیا جہاں ان کی حالت اب بہتر بتائی جاتی ہے۔

اس دل دہلا دینے والے واقعے کے فوراً بعد مقامی انتظامیہ نے سلور ریور میں تیراکی اور کشتی رانی پر عارضی پابندی عائد کر دی، جبکہ فلوریڈا فش اینڈ وائلڈ لائف کنزرویشن کمیشن کے اہلکاروں نے حملہ آور مگرمچھ کی تلاش کے لیے سرچ آپریشن شروع کر دیا۔ حکام کے مطابق 9 اگست کو 9 فٹ 8 انچ لمبے نر مگرمچھ کو کامیابی سے پکڑ کر غیر آباد علاقے میں منتقل کر دیا گیا، جس کے بعد دریا کو دوبارہ عوام کے لیے کھول دیا گیا۔ فلوریڈا حکام اور ماہرینِ حیاتِ وحش نے شہریوں اور سیاحوں کو خبردار کیا ہے کہ ریاست کی تمام 67 کاؤنٹیز کے آبی ذخائر میں مگرمچھ موجود ہوتے ہیں، لہٰذا صرف مخصوص و محفوظ مقامات پر دن کی روشنی میں تیراکی کی جائے، جنگلی جانوروں کو خوراک دینے سے گریز کیا جائے اور پالتو جانوروں کو پانی کے کنارے سے دور رکھا جائے۔