جنوبی کوریا: شدید گرمی نے زمین میں موجود سبزیاں خراب کردیں

جنوبی کوریا میں شدید اور ریکارڈ توڑ گرمی کی لہر نے زرعی شعبے کو تباہی کے دہانے پر پہنچا دیا ہے، جس کے باعث کسانوں کو فصلوں کا غیر معمولی مالی نقصان اٹھانا پڑ رہا ہے۔ ملک کے شمال مشرقی صوبے گانگ وون (Gangwon) کی یانگ گو کاؤنٹی کے ہائیان علاقے میں شدید درجہ حرارت کی وجہ سے آلو اور گوبھی کی فصلیں کھیتوں ہی میں گل سڑ گئی ہیں۔

40 سال سے شعبہ زراعت سے منسلک مقامی کسان لی سانگ ہیوک نے میڈیا سے گفتگو کرتے ہوئے بتایا کہ انہوں نے اپنے چار دہائیوں پر محیط کیریئر میں ایسی تباہ کن صورتحال کبھی نہیں دیکھی۔ ان کے مطابق صرف ایک ہفتہ قبل بالکل ٹھیک دکھائی دینے والے کھیتوں کو جب کھودا گیا تو زمین کے اندر آلو نرم، بدبودار اور ناقابلِ استعمال حالت میں نکلے۔

علاوہ ازیں، قریبی اضلاع میں گرمی کے باعث گوبھی کی ہزاروں ‘پیونگ’ (کورین روایتی رقبی اکائی) اراضی بھی مکمل طور پر جھلس گئی ہے۔ کسانوں کی جانب سے بہتر منڈی ریٹ کے انتظار میں کٹائی موخر کرنا مزید نقصان دہ ثابت ہوا اور فصل تباہ ہونے پر اسے واپس مٹی میں ملانا پڑا۔ کسانوں کے مطابق اس ناگہانی آفت سے کروڑوں ‘وون’ کا نقصان ہوا ہے، جو جنوبی کوریا میں کلائمیٹ چینج اور شدید موسم کے زرعی پیداوار پر بڑھتے ہوئے سنگین اثرات کا واضح ثبوت ہے۔