جاپان: کروڑوں ڈالر کے آرڈرزدیکر ادائیگی نہ کرنے والی خاتون گرفتار

جاپان میں پولیس نے ایک 32 سالہ خاتون کو نامور پبلشنگ ہاؤس ‘شوئیشا’ (Shueisha) کے آن لائن اسٹور سے ڈھائی کروڑ ڈالر (تقریباً 3.9 ارب ین) سے زائد مالیت کی اشیا کے جعلی آرڈرز دینے اور کمپنی کو مالی نقصان پہنچانے کے الزام میں گرفتار کر لیا ہے۔

جاپانی میڈیا کے مطابق اوساکا سے تعلق رکھنے والی ریسٹورنٹ ملازمہ مایو یوشیدا نے 2024ء اور 2025ء کے دوران 238 مختلف جعلی اکاؤنٹس استعمال کرتے ہوئے 2,000 سے زائد نان پیمنٹ آرڈرز کیے۔ خاتون نے جاپان کے کنوینینس اسٹورز کے ‘پری-پیمنٹ’ (Pre-payment) نظام کی خامیوں کا فائدہ اٹھایا، جس کے تحت ادائیگی نہ کرنے کی صورت میں آرڈرز طویل عرصے بعد خودکار طور پر منسوخ ہوتے تھے۔

علاوہ ازیں، ملزمہ نے متعدد بار کیش آن ڈیلیوری (COD) کا آپشن منتخب کیا اور پارسل موصول ہونے پر سامان لینے سے صاف انکار کر دیا۔ اس مسلسل طریقہ واردات کے باعث پبلشنگ کمپنی کو سامان کی پیکنگ، بار بار ترسیل اور واپسی کے بھاری اخراجات برداشت کرنا پڑے۔ پولیس نے دھوکہ دہی اور کاروباری امور میں مداخلت کے الزام کے تحت خاتون کو گرفتار کر کے تحقیقات کا آغاز کر دیا ہے۔