مچھیرے کے چہرے سے آکٹوپس چمٹ گیا، پھر کیا ہوا؟

فلپائن سے تعلق رکھنے والے ایک مچھیرے کی ویڈیو سوشل میڈیا پر تیزی سے وائرل ہو رہی ہے، جس میں ایک آکٹوپس کو اس کے چہرے سے مضبوطی سے چپکے ہوئے دیکھا جا سکتا ہے۔ وائرل ویڈیو میں مچھیرا آکٹوپس کے متعدد بازوؤں کی گرفت سے خود کو آزاد کرانے کی مسلسل کوشش کرتا نظر آتا ہے، جبکہ آکٹوپس نے اپنے سکشن کپس کی مدد سے اس کے چہرے کو جکڑ رکھا تھا۔

کافی جدوجہد اور کئی ناکام کوششوں کے بعد، مچھیرے نے انتہائی مہارت سے آکٹوپس کی گرفت ڈھیلی کی اور بالآخر اسے اپنے چہرے سے الگ کرنے میں کامیاب ہو گیا۔ خود کو محفوظ رکھنے کے بعد مچھیرے نے آکٹوپس کو کسی بھی قسم کا نقصان پہنچائے بغیر واپس سمندری پانی میں چھوڑ دیا۔

ماہرینِ حیاتیات کے مطابق آکٹوپس کے آٹھوں بازوؤں پر سیکڑوں کی تعداد میں انتہائی طاقتور ‘سکشن کپس’ (Suction Cups) موجود ہوتے ہیں، جو اسے شکار پکڑنے اور سطحوں سے چپکنے میں مدد دیتے ہیں۔ ماہرین کا ماننا ہے کہ غیر معمولی صورتحال کا سامنا ہونے پر آکٹوپس نے اپنے دفاعی ردِعمل (Defensive Mechanism) کے تحت مچھیرے کے چہرے کو مضبوطی سے جکڑ لیا تھا۔