چین: مصنوعی ذہانت کا خطرناک مشورہ، 25 ایکڑ فصل راتوں رات تباہ

چین کے صوبہ آنہوئی کے شہر چوزہاؤ سے تعلق رکھنے والے ایک 67 سالہ کسان کو مصنوعی ذہانت (AI) اسسٹنٹ کے ایک غلط مشورے پر اندھا دھند عمل کرنا بھاری پڑ گیا، جس کے نتیجے میں اس کی 25 ایکڑ پر محیط تل کی فصل راتوں رات تباہ ہو گئی۔ رپورٹ کے مطابق یہ کسان گزشتہ ایک سال سے فصلوں کی دیکھ بھال، کھاد اور زرعی منصوبہ بندی کے لیے اے آئی اسسٹنٹ کا استعمال کر رہا تھا، اور ابتدائی کامیابیوں کے باعث اس کا اس ٹیکنالوجی پر اعتماد غیر معمولی حد تک بڑھ چکا تھا۔

مسئلہ اس وقت پیش آیا جب کسان نے تل کی فصل میں کیڑوں اور جڑی بوٹیوں سے نجات کے لیے اے آئی سے دوا کا پوچھا۔ اے آئی کی تجویز کردہ جڑی بوٹی مار دوا ‘فلوفیناسیٹ’ (Flufenacet) کے استعمال کے بعد کھیت میں موجود تمام نوخیز پودے مکمل طور پر سوکھ کر برباد ہو گئے۔ زرعی ماہرین کا کہنا ہے کہ یہ کیمیکل تل کی فصل کے لیے انتہائی شدید نقصان دہ ہو سکتا ہے اگر اسے مخصوص پیمانے اور احتیاط کے بغیر استعمال کیا جائے۔ اس واقعے نے زرعی اور حساس شعبوں میں بغیر کسی تصدیق کے اے آئی کے استعمال پر سنگین سوالات کھڑے کر دیے ہیں اور ماہرین نے تاکید کی ہے کہ اے آئی کی ہدایات پر عمل کرنے سے قبل مستند ماہرینِ زراعت سے مشورہ کرنا لازمی ہے۔