سستی سیاست کیلئے لسانیت کی بھینٹ چڑھانے والوں کا خاتمہ کرنا ہوگا: سعید غنی

صوبائی وزیر سندھ سعید غنی نے کہا ہے کہ سستی اور مفاد پرستانہ سیاست کے لیے عوام کو لسانیت کی بھینٹ چڑھانے والوں کا ہمیشہ کے لیے خاتمہ کرنا ہوگا۔ ایک عوامی جلسے سے خطاب کرتے ہوئے انہوں نے کہا کہ کراچی میں اب لسانیت کی بنیاد پر ووٹ حاصل کرنے کا تاثر تیزی سے ختم ہو رہا ہے اور عوام میں یہ شعور بیدار ہو چکا ہے کہ ووٹ صرف کارکردگی، نظریات اور مثبت سوچ کی بنیاد پر دیا جائے۔ سعید غنی نے زور دیا کہ کراچی جیسے بین الاقوامیت کے حامل شہر سے نفرتوں اور تقسیم کا خاتمہ کرنا ہم تمام سیاسی طبقات اور شہریوں کی مشترکہ ذمہ داری ہے۔

سعید غنی کا مزید کہنا تھا کہ پاکستان پیپلز پارٹی تمام اکائیوں کا گلدستہ ہے جہاں تمام رنگ، نسل اور زبان بولنے والے افراد کو ہر سطح اور ہر عہدے پر نمائندگی حاصل ہے۔ انہوں نے واضح کیا کہ پیپلز پارٹی شہرِ قائد میں تعصب اور لسانی تفریق کو ختم کر کے حقیقی ترقی اور پائیدار امن کے قیام کے لیے اپنی جدوجہد جاری رکھے گی۔