ایمرجنسی کا نفاذ تحریک انصاف کی ضد اور عدم تعاون کا نتیجہ ہے: طارق فضل چودھری

وفاقی وزیر برائے پارلیمانی امور طارق فضل چوہدری نے کہا ہے کہ خیبر پختونخوا میں ایمرجنسی کا نفاذ پاکستان تحریک انصاف کی ضد، عدم تعاون اور انسدادِ دہشت گردی کی جنگ میں وفاق کا ساتھ نہ دینے کے باعث کیا گیا۔ اسلام آباد میں میڈیا سے گفتگو کرتے ہوئے طارق فضل چوہدری نے واضح کیا کہ اس آئینی اقدام کی پارلیمان سے توثیق کرائی جائے گی اور ایمرجنسی اس وقت تک برقرار رہے گی جب تک اس کے مقاصد حاصل نہیں ہو جاتے۔ انہوں نے اپوزیشن کی آل پارٹیز کانفرنس (APC) میں حکومتی نمائندوں کو مدعو کرنے کی پیشکش کرتے ہوئے کہا کہ حکومت دہشت گردی کا مکمل ڈیٹا اپوزیشن کے سامنے رکھنے کے لیے تیار ہے۔ وفاقی وزیر نے بتایا کہ امن و امان کی بحالی کے لیے صوبے کے 12 اضلاع میں خصوصی انتظامی سیٹ اپ قائم کیا گیا ہے اور علاقوں کو کلیئر کر کے سول انتظامیہ کے حوالے کیا جائے گا۔ انہوں نے مزید کہا کہ سیاسی اختلافات کے باوجود مذاکرات کے دروازے کھلے ہیں، تاہم پی ٹی آئی نے قومی سلامتی پر سیاسی سرگرمیوں کو ترجیح دی۔