خیبر پختونخوا میں ایمرجنسی نفاذ کے خلاف سینیٹ میں قرارداد جمع

خیبر پختونخوا میں ایمرجنسی کے نفاذ کے خلاف سینیٹ آف پاکستان میں مذمتی قرارداد جمع کرا دی گئی ہے۔ جے یو آئی (ف) کے سینیٹر کامران مرتضیٰ کی جانب سے جمع کرائی گئی قرارداد میں موقف اختیار کیا گیا ہے کہ خیبر پختونخوا میں ایمرجنسی کا نفاذ آئینی تقاضوں کے شدید متصادم اور صوبائی خودمختاری سمیت عوام کے بنیادی حقوق پر حملہ ہے۔ قرارداد میں وزیراعظم کی ایڈوائس پر صدر مملکت کی جانب سے ایمرجنسی کے نفاذ پر آئینی سوالات اٹھاتے ہوئے کہا گیا ہے کہ فیصلہ سازی کے وقت صدر کا آئینی اطمینان موجود نہیں تھا۔ سینیٹ میں جمع کرائی گئی اس قرارداد میں وفاقی حکومت سے ایمرجنسی کے نفاذ کی تمام تر وجوہات اور متعلقہ ریکارڈ پارلیمنٹ میں پیش کرنے اور اس غیر آئینی حکم کو فوری طور پر واپس لینے کا مطالبہ کیا گیا ہے۔ مزید برآں، قرارداد کی منظوری کے بعد اس کی کاپیاں صدر، وزیراعظم اور وزیر قانون کو ارسال کرنے کی سفارش کی گئی ہے۔