خیبر پختونخوا کے 12 اضلاع میں امن و ترقی کیلئے فنڈز کی فوری فراہمی کا فیصلہ

وفاقی وزیر داخلہ محسن نقوی کی زیر صدارت علاقائی ترقیاتی سیکرٹریٹ کے ممبران کا اعلیٰ سطح کا اہم اجلاس منعقد ہوا، جس میں خیبر پختونخوا کے 12 اضلاع—بشمول قبائلی اضلاع، بنوں، لکی مروت، ٹانک اور ڈیرہ اسماعیل خان—میں پائیدار امن کی بحالی اور تیز رفتار ترقی کے لیے فنڈز کی فوری فراہمی کا فیصلہ کیا گیا۔ اجلاس میں کور کمانڈر پشاور، ایڈیشنل چیف سیکرٹری اور سول و عسکری حکام نے شرکت کی۔ فورم نے خطے میں دہشت گردی کے خاتمے اور سیکیورٹی کی بہتری کے لیے مقامی عوام کے کلیدی کردار کو سراہتے ہوئے عزم ظاہر کیا کہ وفاقی حکومت، صوبائی انتظامیہ کے اشتراک سے محرومیوں کے ازالے، روزگار کے مواقع کی فراہمی اور نوجوانوں کی تکنیکی تربیت کے لیے ہنگامی بنیادوں پر کام کرے گی۔ اجلاس کے دوران جاری ترقیاتی منصوبوں کی بروقت تکمیل، تعلیم و صحت کے انفراسٹرکچر کی بہتری اور مقامی عمائدین کی تجاویز کے مطابق فنڈز کے شفاف استعمال کو یقینی بنانے کے حوالے سے بھی اہم ہدایات جاری کی گئیں