فیلڈ مارشل عاصم منیر سے برازیلی فوجی وفد کی ملاقات، دفاعی تعاون بڑھانے پر اتفاق

برازیل کی مسلح افواج کے جوائنٹ چیفس آف اسٹاف کے سربراہ ایڈمرل ریناٹو روڈریگز ڈی اگویار فریرے کی قیادت میں اعلیٰ سطح کے وفد نے جنرل ہیڈ کوارٹرز (جی ایچ کیو) راولپنڈی کا دورہ کیا، جہاں انہوں نے آرمی چیف و چیف آف ڈیفنس فورسز، فیلڈ مارشل سید عاصم منیر سے اہم ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق جی ایچ کیو آمد پر معزز مہمان کو مسلح افواج کے چاق و چوبند دستے نے گارڈ آف آنر پیش کیا۔ ملاقات کے دوران باہمی دلچسپی کے امور، علاقائی سلامتی کی صورتحال اور دفاعی و سیکیورٹی شعبوں میں دوطرفہ تعاون کے فروغ پر تفصیلی تبادلہ خیال کیا گیا۔ اس موقع پر دونوں فریقوں نے دیرینہ دوستانہ تعلقات پر اطمینان کا اظہار کرتے ہوئے عسکری روابط کو مزید وسعت دینے پر اتفاق کیا۔ برازیلین ایڈمرل نے پاک افواج کی اعلیٰ پیشہ ورانہ مہارت، آپریشنل تیاریوں اور علاقائی امن و استحکام کے لیے پیش کی جانے والی خدمات کو سراہا، جبکہ فیلڈ مارشل سید عاصم منیر نے برازیل کے ساتھ دفاعی شراکت داری کو مزید مضبوط بنانے کے پاکستان کے عزم کا اعادہ کیا۔