وزیراعظم کا ایس ایم ایز کیلئے قرضوں کا حجم 2028 تک 2.2 ٹریلین روپے کرنے کا حکم

وزیراعظم محمد شہباز شریف نے چھوٹے اور درمیانے درجے کے کاروبار (SMEs) کے فروغ کے لیے قرضوں کی مجموعی مالیت 2028 تک 1.1 ٹریلین روپے سے بڑھا کر 2.2 ٹریلین روپے کرنے کی ہدایت کی ہے۔ سمیڈا اصلاحات کے حوالے سے منعقدہ اعلیٰ سطح کے اجلاس کی صدارت کرتے ہوئے وزیراعظم نے کہا کہ کاروباری طبقہ ملکی معیشت کی ریڑھ کی ہڈی ہے اور سمیڈا میں اصلاحات کا مقصد کاروباری افراد کو بااختیار بنانا اور روزگار پیدا کرنا ہے۔ اجلاس کے دوران بریفنگ میں بتایا گیا کہ سمیڈا کو ایک مرکزی پلیٹ فارم میں تبدیل کیا جا رہا ہے جہاں تربیت، فیزیبلٹیز کی مقامی زبانوں میں تیاری، اور بینکوں سے مالی معاونت کی سہولیات ایک ساتھ فراہم کی جائیں گی۔ اس کے علاوہ، شہریوں کو مقامی زبانوں میں رہنامئی کے لیے مصنوعی ذہانت (AI) پر مبنی ہیلپ لائن کا قیام اور عالمی ای کامرس کمپنی ‘علی بابا’ کے ساتھ معاہدے کے تحت دو سالوں میں 10 ہزار ایس ایم ایز کو ڈیجیٹل ٹریننگ فراہم کرنے کی منظوری بھی شامل ہے۔ وزیراعظم نے ہدایت کی کہ پسماندہ علاقوں میں معاشی سرگرمیاں بڑھا کر بڑے شہروں کی طرف نقل مکانی کو روکا جائے اور قرضوں کے حصول کے عمل کو سادہ بنایا جائے۔