ترکی میں مسافر بس اور ٹرک میں تصادم، 11 افراد ہلاک، 27 زخمی

ترکی کے مغربی صوبے مانیسا میں مسافر بس اور ٹرک کے درمیان خوفناک تصادم کے نتیجے میں کم از کم 11 افراد ہلاک اور 27 شدید زخمی ہو گئے ہیں۔ فرانسیسی خبر رساں ادارے (AFP) کے مطابق حادثہ بورسا اور ساحلی شہر ازمیر کو ملانے والی شاہراہ کے داخلی راستے کے قریب پیش آیا۔ ترکی کے وزیر داخلہ مصطفیٰ چیفتچی نے واقعے کی تصدیق کرتے ہوئے بتایا کہ اطلاع ملتے ہی امدادی ٹیموں نے جائے وقوعہ پر پہنچ کر ریسکیو آپریشن شروع کر دیا تھا اور وہ خود اس کی نگرانی کر رہے ہیں۔ حادثے کی شدت کے باعث مسافر بس سڑک کنارے نصب حفاظتی رکاوٹوں سے ٹکرا کر تباہ ہو گئی۔ ترک حکام و میڈیا کے مطابق حادثے کی تحقیقات شروع کر دی گئی ہیں اور بس و ٹرک دونوں کے ڈرائیوروں کو حراست میں لے لیا گیا ہے۔