بلوچستان میں معاشی بحالی کے لیے سٹریٹجک منصوبوں کا آغاز

بلوچستان میں روزگار کی فراہمی، معاشی بحالی، تعلیمی اصلاحات، صحت کی سہولیات اور ڈیجیٹل اکانومی کے فروغ کے لیے سٹریٹجک منصوبوں کا عمل درآمد شروع کر دیا گیا ہے۔ چیف سیکرٹری بلوچستان شکیل قادر خان کی زیر صدارت انعقاد پذیر ہونے والے اعلیٰ سطح کے جائزہ اجلاس میں صوبے میں جاری اور نئے معاشی و سماجی منصوبوں پر پیش رفت کا تفصیل سے جائزہ لیا گیا۔

اجلاس میں چیف سیکرٹری نے بتایا کہ حکومت صوبے کی پائیدار معاشی بحالی اور نوجوانوں کی بااختیاری کے لیے ہمہ جہت اقدامات کر رہی ہے۔ انہوں نے انکشاف کیا کہ صوبے کے تمام اضلاع میں 57 ہزار افراد کو معاشی خودانحصاری اور کاروبار شروع کرنے کے لیے گرانٹس کی فراہمی کا ہدف مقرر کیا گیا ہے، جس میں سے انٹرپرائز ڈیویلپمنٹ کے تحت 2,500 افراد کو گرانٹس جاری بھی کی جا چکی ہیں۔