ایران غزہ مذاکرات میں حماس کے ساتھ کھڑا رہے گا: مسعود پزشکیان

ایرانی صدر مسعود پزشکیان نے عزم ظاہر کیا ہے کہ ایران غزہ سے متعلق جاری مذاکراتی عمل میں حماس کے ساتھ پوری طاقت سے کھڑا رہے گا اور فلسطینی قیادت کے ہر فیصلے کی مکمل حمایت کرے گا۔ ایرانی صدر نے حماس کے پولیٹیکل بیورو کے سربراہ خلیل الحیہ سے ٹیلی فون پر گفتگو کرتے ہوئے کہا کہ تہران فلسطینی رہنماؤں کی جانب سے اٹھائے گئے تمام اقدامات کی پشت پناہی کرتا رہے گا۔

یہ بیان ایک ایسے وقت میں سامنے آیا ہے جب خطے میں جنگ بندی کے حوالے سے غیر یقینی صورتحال برقرار ہے۔ واضح رہے کہ امریکی صدر ڈونلڈ ٹرمپ نے مصر، قطر اور ترکیہ کی وساطت سے مذاکرات کے بعد حماس کے ہتھیار ڈالنے کا دعویٰ کیا تھا، تاہم حماس نے واضح کیا ہے کہ اسرائیلی افواج کے انخلا سے قبل ہتھیار ڈالنے کا سوال ہی پیدا نہیں ہوتا۔ دوسری جانب اسرائیلی وزیراعظم بنیامین نیتن یاہو نے بھی ڈونلڈ ٹرمپ کے مجوزہ منصوبے کو قبول کرنے سے انکار کر دیا ہے، جس کے باعث غزہ جنگ بندی اور مذاکراتی عمل کی پیش رفت پر سوالیہ نشان برقرار ہے۔