سعودی عرب نے کشیدگی میں کمی کیلئے مذاکرات کا سلسلہ برقرار رکھنا ناگزیر قرار دیدیا

سعودی عرب نے مشرقِ وسطیٰ میں بڑھتی ہوئی کشیدگی اور بحران کے حل کے لیے سفارتی مذاکرات کے سلسلے کو برقرار رکھنے کو ناگزیر قرار دیا ہے۔ جدہ میں کابینہ کے ہفتہ وار اجلاس کی صدارت کرتے ہوئے ولی عہد اور وزیراعظم شہزادہ محمد بن سلمان نے پُرامن حالات کے قیام اور علاقائی سیکیورٹی کو یقینی بنانے کے لیے ہر ممکن سفارتی کوششیں تیز کرنے پر زور دیا۔ اس موقع پر انہوں نے امریکی صدر ڈونلڈ ٹرمپ کے ساتھ ہونے والے حالیہ ٹیلی فونک رابطے کے بارے میں بھی کابینہ کو تفصیلات سے آگاہ کیا۔

سعودی کابینہ نے بحیرہ احمر، باب المندب اور خلیجِ عدن میں تجارتی جہاز رانی کی حفاظت کے لیے سعودی عرب کی قیادت میں قائم ہونے والے 14 ملکی ‘کثیرالقومی دفاعی بحری اتحاد’ میں بین الاقوامی شرکت کا خیرمقدم کیا۔ سعودی وزارتِ دفاع کے مطابق اس میری ٹائم اتحاد کا مقصد اہم بحری گزرگاہوں، توانائی کی ترسیل اور عالمی تجارت کو درپیش خطرات سے محفوظ رکھنا ہے۔ دوسری جانب، امریکی حکام نے ایران کے ساتھ جلد ایک معاہدہ طے پانے کا امکان ظاہر کیا ہے جس کے تحت حالیہ کشیدگی کے بعد بند کی گئی آبنائے ہرمز کو تجارتی جہاز رانی کے لیے دوبارہ کھولا جا سکے گا۔