حکومتِ پاکستان نے “فارن میڈیا فیسلیٹیشن گائیڈ لائنز 2026” جاری کر دیں: غیر ملکی و مقامی صحافیوں کے لیے آن لائن رجسٹریشن اور این او سی لازمی قرار

وزارتِ اطلاعات، حکومتِ پاکستان نے غیر ملکی صحافیوں اور اداروں کی سہولت اور نظم و ضبط کے قیام کے لیے “فارن میڈیا فیسلیٹیشن گائیڈ لائنز 2026” باضابطہ طور پر جاری کر دی ہیں۔ ان نئی گائیڈ لائنز کے تحت غیر ملکی میڈیا سے وابستہ تمام صحافیوں، کمپنیوں اور پروڈکشن ہاؤسز کی ایکسٹرنل پبلسٹی (EP) ونگ کے ساتھ رجسٹریشن کو لازمی قرار دے دیا گیا ہے۔ اس پالیسی کے دائرہ کار میں پرنٹ، الیکٹرانک، ڈیجیٹل اور سوشل میڈیا سے منسلک تمام پلیٹ فارمز کے علاوہ غیر ملکی اداروں کے لیے کام کرنے والے مقامی (پاکستانی) صحافی بھی شامل ہوں گے۔

نئے جاری کردہ قواعد و ضوابط کے مطابق کامیاب رجسٹریشن کے بعد ہی پریس ایکریڈیٹیشن کارڈ کے لیے آن لائن درخواست دی جا سکے گی۔ وزارت کی جانب سے مستقل ایکریڈیٹیشن کارڈ ایک سال کے لیے جبکہ عارضی کارڈ تین ماہ کی مدت کے لیے جاری کیا جائے گا، جو سرکاری تقریبات اور میڈیا ایونٹس تک رسائی کے لیے استعمال ہوگا۔ مزید برآں، اسلام آباد، لاہور اور کراچی کے علاوہ ملک کے دیگر تمام حصوں میں رپورٹنگ یا کوریج کے لیے ای پی (EP) ونگ سے این او سی (NOC) حاصل کرنا لازمی ہوگا، جس کے بغیر سرکاری نوعیت کی کوریج پر پابندی عائد ہوگی۔