ایران کی نئی امریکی کارروائی پر خلیج کی توانائی تنصیبات کو نشانہ بنانے کی وارننگ

ایران نے خبردار کیا ہے کہ اگر امریکی انتظامیہ کی جانب سے اس کے خلاف کوئی نئی ملٹری کارروائی یا حملہ کیا گیا تو اس کا دائرہ کار پورے خطے تک پھیلا دیا جائے گا۔ برطانوی خبر رساں ادارے کے مطابق تہران نے خلیجی ممالک کو باضابطہ پیغام بھیجا ہے کہ کسی بھی امریکی جارحیت کی صورت میں خلیج بھر میں موجود توانائی کی اہم تنصیبات، آئل فیلڈز، ریفائنریوں، بجلی اور پانی کے بنیادی ڈھانچے، ٹرانسپورٹ نیٹ ورکس اور امریکی مفادات کو نشانہ بنایا جائے گا۔

رپورٹ کے مطابق یہ سخت اور انتباہی پیغام ایرانی وزیرِ خارجہ عباس عراقچی نے سعودی عرب، قطر، ترکیہ کے وزرائے خارجہ اور پاکستانی حکام سے سفارتی رابطوں کے دوران منتقل کیا۔ ایران نے علاقائی ممالک پر زور دیا ہے کہ وہ امریکی صدر ڈونلڈ ٹرمپ کو مزید کارروائی سے باز رکھنے اور تنازع کے سفارتی حل کے لیے اپنا اثر و رسوخ استعمال کریں۔ تہران نے واضح کیا کہ اگر اس کے قومی یا اقتصادی بنیادی ڈھانچے پر حملہ ہوا تو اس کا سخت جواب پورے مشرقِ وسطیٰ میں دیا جائے گا۔