روس کی کیف پر میزائلوں اور ڈرونز کی بارش، 21 افراد ہلاک، درجنوں زخمی

روس نے یوکرین کے دارالحکومت کیف اور اس کے نواحی علاقوں پر بیلسٹک میزائلوں اور ڈرونز سے بڑے پیمانے پر تباہ کن حملے کیے ہیں، جن کے نتیجے میں کم از کم 21 افراد ہلاک اور 45 سے زائد شدید زخمی ہو گئے۔ عالمی خبر رساں اداروں کے مطابق یوکرینی فضائیہ نے بتایا کہ روس نے 24 بیلسٹک میزائل، 4 اینٹی شپ میزائل اور 115 ڈرون داغے۔ اگرچہ یوکرینی ایئر ڈیفنس نے 98 ڈرون مار گرائے، لیکن متعدد بیلسٹک میزائل شہری تنصیبات، رہائشی عمارتوں، اور ریلوے اسٹیشن سے ٹکرا گئے۔

کیف پر ہوئے اس حملے کے بعد کئی عمارتیں زمین بوس ہو گئیں اور بڑے پیمانے پر آگ بھڑک اٹھی، جس کے باعث ہلاکتوں میں مزید اضافے کا خدشہ ظاہر کیا جا رہا ہے۔ یوکرین کے صدر ولادیمر زیلنسکی نے مغربی اتحادیوں اور نیٹو ممالک پر تنقید کرتے ہوئے کہا کہ اگر وقت پر بیلسٹک میزائل روکنے والے جدید پیٹریاٹ انٹرسیپٹر فراہم کیے جاتے تو یہ قیمتی جانیں بچائی جا سکتی تھیں۔ دوسری جانب روسی وزارت دفاع نے حملوں کی تصدیق کرتے ہوئے دعویٰ کیا ہے کہ کیف اور بحیرہ اسود میں اوڈیسا کی بندرگاہ پر ان فوجی لاجسٹک مراکز اور کارگو جہازوں کو نشانہ بنایا گیا ہے جو مغربی ہتھیاروں کی ترسیل کے لیے استعمال ہو رہے تھے۔