بھارت کا اسمارٹ فونز کی نگرانی کیلئے ایک اور منصوبے پر غور

بھارت نے کچھ روز قبل تمام اسمارٹ فونز میں حکومتی سائبر سکیورٹی ایپ کو پری انسٹال کرنے کا فیصلہ واپس لے لیا تھا۔
مگر اب حکومت کی جانب سے ایک نئی تجویز سامنے آئی ہے جس کے تحت اسمارٹ فونز تیار کرنے والی کمپنیوں کو تمام فونز میں ہمیشہ کام کرنے والی سیٹلائیٹ لوکیشن ٹریکنگ کو ان ایبل کرنا ہوگا۔
اس کے تحت لوکیشن سروسز ہر وقت ٹرن آن رہیں گی اور ان کو اآف کرنے کا آپشن صارفین کو دستیاب نہیں ہوگا۔
خبر رساں ادارے رائٹرز کی ایک رٌورٹ کے مطابق بھارتی ٹیلی کام انڈسٹری یہ بھی چاہتی ہے کہ فون کمپنیوں کی جانب سے ان نوٹیفکیشنز کو ڈس ایبل کر دیا جائے جو صارفین کو آگاہ کرتے ہیں کہ ٹیلی کام کمپنیوں کو ان کی لوکیشن تک رسائی حاصل ہے
اس حوالے سے بھارتی وزارت داخلہ کے حکام کی ملاقات اسمارٹ فون انڈسٹری کے عہدیداران سے 5 دسمبر کو ہونا تھی، مگر اسے ملتوی کر دیا گیا۔
اس تجویز میں دعویٰ کیا گیا ہے کہ اس سے قانون نافذ کرنے والے اداروں کو آپ کو شرپسند عناصر سے محفوظ رکھنے میں مدد ملے گی۔
وزیراعظم نریندرا مودی کی انتظامیہ کو ہمیشہ یہ فکر رہتی ہے کہ تحقیقات کے دوران قانون نافذ کرنے والے ادارون کو لوکیشن ڈیٹا تک مناسب رسائی حاصل نہیں ہوگی۔
ایپل، گوگل اور سام سنگ اس منصوبے کے مخالف ہیں اور انہوں نے حکومت پر اسے مسترد کرنے کے لیے زور دیا ہے۔
دوسری جانب انڈیا سیلولر اینڈ الیکٹرونکس ایسوسی ایشن نے موسم گرما میں ایک مراسلے کے ذریعے حکومت کو کہا تھا کہ اس طرح کے منصوبے کی دنیا میں کوئی مثال موجود نہیں۔
مراسلے میں انتباہ کیا گیا کہ اس سے فوجیوں، ججز، کارپوریٹ ایگزیکٹوز اور صحافیوں کی پرائیویسی متاثر ہوگی۔