مقدمے سے بچنے کیلئے چینی شہری نے اپنی ہی موت کا ڈرامہ رچا دیا

چین کے صوبہ ہونان میں شراب پی کر گاڑی چلانے کے جرم اور متوقع قید کی سزا سے بچنے کے لیے ایک شخص نے اپنی والدہ اور دادی کے ساتھ مل کر اپنی ہی جعلی موت اور تدفین کا ڈرامہ رچا دیا۔ پولیس کے مطابق ‘سی’ نامی ملزم جنوری 2025 میں تیسری بار نشے کی حالت میں ڈرائیونگ کرتے ہوئے پکڑا گیا تھا، جس کے بعد اس نے ضمانت پر رہا ہو کر گھر میں خالی دوائیوں کی بوتلیں بکھیریں اور جسم ٹھنڈا رکھ کر موت کا سوانگ رچایا۔ اہلخانہ نے بغیر پولیس کو اطلاع دیے اسی دن تدفین کا ڈرامہ کیا، جبکہ ملزم خفیہ طور پر صوبہ یوننان فرار ہو گیا۔ تاہم ڈیتھ سرٹیفکیٹ کی عدم موجودگی اور بینک ریکارڈز کی مدد سے پولیس نے اپریل 2026 میں ملزم کو گرفتار کر لیا۔ عدالت نے ملزم کو 5 ماہ قید اور 20,000 یوآن جرمانے کی سزا سنائی ہے، جبکہ اس کی والدہ اور دادی کے خلاف بھی قانونی کارروائی جاری ہے۔