توانائی کا بحران، کیوبا میں سولر سے چلنے والی ٹرائی سائیکل مقبول

کیوبا میں طویل عرصے سے جاری شدید ایندھن کے بحران کے باعث سڑکوں پر روایتی کلاسک گاڑیوں کی جگہ اب چین میں تیار کردہ الیکٹرک تین پہیوں والی گاڑیاں (ٹرائی سائیکلز) شہریوں کی آمدورفت کا اہم ذریعہ بن چکی ہیں۔ امریکی صدر ڈونلڈ ٹرمپ کی جانب سے کیوبا کو تیل فراہم کرنے والے ممالک پر ٹیرف کی دھمکی کے بعد ایندھن کی آمد شدید متاثر ہوئی ہے، جہاں ماہانہ 8 کے بجائے صرف 1 آئل ٹینکر پہنچ رہا ہے، جبکہ کیوبا اپنی ضرورت کا صرف 40 فیصد ایندھن خود پیدا کرتا ہے۔ اس صورتحال سے نمٹنے کے لیے شہریوں نے 2000 سے 4000 امریکی ڈالر مالیت کی ان الیکٹرک ٹرائی سائیکلز پر سولر پینلز بھی نصب کر لیے ہیں تاکہ ملک کے متاثرہ بجلی کے نظام پر بوجھ نہ پڑے اور پبلک ٹرانسپورٹ کی عدم دستیابی کے باوجود نقل و حمل جاری رکھی جا سکے۔