چور مالِ مسروقہ بیچنے گھر کے مالک کی ہی دکان پر پہنچ گیا

بھارتی ریاست جھارکھنڈ کے شہر دھنباد میں ایک دلچسپ اور انوکھا واقعہ سامنے آیا ہے، جہاں ایک چور گھر سے چرایا گیا واٹر پمپ بیچنے کے لیے اسی گھر کے مالک کی دکان پر پہنچ گیا اور رنگے ہاتھوں پکڑا گیا۔ بالیاپور کے رہائشی سادھو پال کے گھر سے ایک ہفتہ قبل چار پنکھے اور ایک واٹر پمپ چوری ہوا تھا، جس کے بعد چور (وجے پال) اسی پمپ کو فروخت کرنے کے لیے بازار آیا۔ خوش قسمتی سے وہ سادھو پال کی کپڑے کی دکان پر ہی پہنچ گیا جہاں اس کے بھائی نے پمپ کو فوراً پہچان لیا۔ پوچھ گچھ پر ملزم نے گھبرا کر بھاگنے کی کوشش کی لیکن دیگر دکانداروں نے اسے دھر دبوچا اور پولیس کے حوالے کر دیا۔ بالیاپور تھانے کے مطابق ملزم کے خلاف کیس درج کر کے اس کے دیگر ساتھیوں اور چوری شدہ بقایا سامان کی برآمدگی کے لیے تفتیش شروع کر دی گئی ہے۔