انوکھی رسم! بارش کیلئے گدھوں کی شادی کرا دی گئی

بھارت میں بارش کے حصول اور خشک سالی کے خاتمے کے لیے ایک بار پھر عجیب و غریب اور انوکھی رسم سامنے آئی ہے، جہاں گدھوں کو گلاب جامن کھلانے کے بعد اب ان کی باقاعدہ شادی کروا دی گئی ہے۔ بھارتی میڈیا کے مطابق ریاست آندھرا پردیش کے ضلع اننت پور کے گاؤں کرلا پلی میں مقامی مکینوں نے مون سون کی اچھی بارشوں کی امید میں دو گدھوں کی شادی کی تقریب منعقد کی۔ اس موقع پر ڈھول کی تھاپ پر گدھوں کے جوڑے کا پورے گاؤں میں جلوس نکالا گیا، جس کے بعد ان پر پانی ڈال کر خصوصی دعائیں مانگی گئیں۔ اہلینِ علاقہ کا کہنا ہے کہ ماضی میں بھی ایسی رسم ادا کرنے پر علاقے میں زبردست بارشیں ہوئی تھیں اور انہیں قوی امید ہے کہ اس بار بھی یہ پرانی روایت مون سون کے سیزن کو بہترین بنانے کا سبب بنے گی۔