امریکا: لاٹری کھیلنے کے اچانک خیال نے بڑا انعام جتوا دیا

امریکا میں لاٹری کھیلنے کے اچانک خیال نے ایک خوش نصیب شہری کو راتوں رات لاکھوں ڈالر کا مالک بنا دیا۔ ریاست ساؤتھ کیرولائنا کے رہائشی ایک شخص نے میڈیا کو بتایا کہ وہ اپنے گھر کے برآمدے میں عام روٹین کے مطابق بیٹھا تھا کہ اسے اچانک شدت سے یہ احساس ہوا کہ اسے لاٹری کا ٹکٹ خریدنا چاہیے۔ اس انوکھے خیال کے فوراً بعد وہ قریبی اسٹور گیا اور وہاں سے 10، 10 ڈالر کے 2 اسکریچ آف ٹکٹ خریدے۔ ان میں سے ایک ٹکٹ ‘گولڈ والٹ ایکسٹرا پلے!’ نکلا، جس نے اس کی قسمت بدل دی اور اسے پورے 5 لاکھ ڈالر (نصف ملین ڈالر) کا بڑا انعام جتوا دیا۔ لاٹری جیتنے والے شخص کا کہنا تھا کہ اتنی خطیر رقم جیتنے پر وہ اس قدر حیران اور ششدر رہ گیا کہ اسے فوری طور پر اپنی اس بڑی خوشی کو روایتی انداز میں منانے کا بھی وقت نہیں ملا۔