خلائی سائنسدانوں کے استعفوں کے بعد مودی سرکار پریشان، رضاکارانہ ریٹائرمنٹ اور استعفوں پر پابندی لگادی

بھارتی خلائی ادارے اسرو (ISRO) میں 120 خلائی سائنسدانوں کے اچانک استعفوں کے بعد بھارتی حکومت شدید پریشانی کا شکار ہو گئی ہے، جس کے ردعمل میں محکمہ خلاء نے سائنسدانوں کی رضاکارانہ ریٹائرمنٹ اور استعفوں پر سخت پابندیاں عائد کر دی ہیں۔ نئی پالیسی کے تحت اب سائنسدانوں کی رضاکارانہ ریٹائرمنٹ کا فیصلہ ڈیپارٹمنٹ ہیڈ نہیں کر سکے گا، بلکہ ہر کیس کی سماعت خلائی ادارے کے ہیڈ کوارٹر میں ہوگی۔ بھارتی میڈیا کے مطابق گگن یان اور دیگر اہم خلائی منصوبوں پر کام کرنے والے ماہرین اور انجینئرز کی جانب سے استعفوں کی درخواستوں میں نمایاں اضافہ ہوا ہے، جس کی بڑی وجہ سرکاری اداروں کا فرسودہ نظام اور نجی شعبے میں ملنے والی زیادہ تنخواہیں ہیں۔ رپورٹ میں مزید بتایا گیا ہے کہ 2020 میں نجی شعبے کے لیے خلائی میدان کھولنے کے بعد بھارت میں 400 سے زائد اسپیس اسٹارٹ اپس قائم ہو چکے ہیں، جنہوں نے اب تک تقریباً 500 ملین ڈالر کی سرمایہ کاری حاصل کی ہے اور یہی نجی ادارے اب سرکاری سائنسدانوں کی توجہ کا مرکز بنے ہوئے ہیں۔