دوسرا ٹی 20: پاکستان انڈر 19 ویمنز نے جنوبی افریقا کو 47 رنز سے ہرا دیا

کراچی کے نیشنل بینک اسٹیڈیم میں کھیلے گئے دوسرے انڈر 19 ویمنز ٹی 20 میچ میں پاکستان نے جنوبی افریقا کو 47 رنز سے ہرا کر پانچ میچوں کی سیریز 1-1 سے برابر کر دی ہے۔ جنوبی افریقا نے ٹاس جیت کر پاکستان کو پہلے بیٹنگ کی دعوت دی، جس پر پاکستانی ٹیم نے مقررہ 20 اوورز میں 4 وکٹوں کے نقصان پر 125 رنز بنائے۔ پاکستان کی جانب سے اوپنر راویل خان نے شاندار کارکردگی کا مظاہرہ کرتے ہوئے 64 گیندوں پر 68 رنز کی ناقابلِ شکست اننگز کھیلی اور پلیئر آف دی میچ قرار پائیں، جبکہ کومل خان نے 23 رنز بنائے۔ 126 رنز کے ہدف کے تعاقب میں جنوبی افریقا کی پوری ٹیم 17.1 اوورز میں محض 78 رنز پر ڈھیر ہو گئی۔ جنوبی افریقا کی جانب سے ڈیڈری وان رینسبرگ 20 رنز کے ساتھ نمایاں رہیں۔ پاکستان کی بولنگ لائن میں ماہ نور زیب نے 3، ماہ نور نے 2 اور ماہم نزاکت نے 2 وکٹیں حاصل کر کے اپنی ٹیم کی فتح میں اہم کردار ادا کیا۔ واضح رہے کہ سیریز کا پہلا میچ جنوبی افریقا نے جیتا تھا، جبکہ تیسرا میچ اتوار کو کھیلا جائے گا۔