امریکا: ٹی ریکس کے ڈھانچے کی کروڑوں ڈالر میں ریکارڈ نیلامی

امریکی ریاست ساؤتھ ڈکوٹا کی تاریخی زمین سے دریافت ہونے والے ۶ کروڑ ۷۰ لاکھ سال قدیم “ٹی رینوسورس ریکس” (ٹی ریکس) ڈائنوسار کے ایک عظیم الشان ڈھانچے کو نیویارک میں سوتھبیز کی نیلامی کے دوران ۵ کروڑ ۱۳ ہزار ڈالر (قریباً ۵۰ ملین ڈالر) میں فروخت کر دیا گیا ہے۔ اس ریکارڈ ساز نیلامی کے بعد یہ تاریخی ڈھانچہ دنیا کا سب سے مہنگے داموں بکنے والا فوسل بن گیا ہے۔ “گَس” کے نام سے موسوم یہ فوسل ساؤتھ ڈکوٹا کے مویشی پالنے والے گیری “گس” لکنگ کی اراضی سے دریافت ہوا تھا، جن کا انتقال ۲۰۲۲ میں کھدائی شروع ہونے کے ایک سال بعد ہو گیا تھا۔ سوتھبیز کے مطابق ۳۸ فٹ طویل، ساڑھے ۱۲ فٹ اونچے اور ۵۴ انچ لمبی کھوپڑی والے اس ڈھانچے میں ۱۸۳ ہڈیاں شامل ہیں، جو ہڈیوں کی تعداد کے لحاظ سے ۶۱ فیصد جبکہ مجموعی حجم کے اعتبار سے ۷۵ سے ۸۰ فیصد تک مکمل ہے، جس کی وجہ سے یہ اب تک دریافت ہونے والے سب سے بڑے ٹی ریکس ڈھانچوں میں شمار ہوتا ہے۔ یہ نایاب فوسل مشہور ہیل کریک فارمیشن سے دریافت ہوا ہے جہاں ۱۹۰۲ میں پہلا ٹی ریکس ڈھانچہ ملا تھا۔ اس سے قبل دنیا کے مہنگے ترین فوسل کا ریکارڈ “ایپیکس اسٹیگوسورس” کے پاس تھا جو ۲۰۲۴ میں ۴ کروڑ ۴۶ لاکھ ڈالر میں فروخت ہوا تھا۔