انگلینڈ کے خلاف جیت پر ارجنٹینا کی ٹیم نے فیفا قوانین کی دھجیاں اڑا دیں

امریکا میں کھیلے جا رہے فیفا ورلڈ کپ 2026 کے دوسرے سیمی فائنل میں ارجنٹائن کی ٹیم نے انگلینڈ کو سنسنی خیز مقابلے کے بعد 1-2 سے شکست دے کر فائنل کے لیے کوالیفائی کر لیا، تاہم اس یادگار فتح کے بعد ارجنٹائن کے کھلاڑیوں کی ایک متنازع حرکت نے نیا تنازع کھڑا کر دیا ہے۔ میچ ختم ہونے کے فوراً بعد جشن مناتے ہوئے ارجنٹائن کے کھلاڑیوں، جن میں لیسانڈرو مارٹنیز اور جیوانی لو سیلسو نمایاں تھے، نے میدان میں ایک سیاسی تحریر والا بینر لہرایا جس پر ہسپانوی زبان میں لکھا تھا “Las Malvinas son Argentinas” یعنی “فاک لینڈ جزائر ارجنٹائن کی ملکیت ہیں”۔ ارجنٹائن کے مداحوں کی جانب سے بھی اسٹیڈیم میں اسی نوعیت کے بینرز لہرائے گئے۔

ارجنٹائن اور برطانیہ (انگلینڈ) کے درمیان فاک لینڈ جزائر (جنہیں ارجنٹائن میں مالویناس کہا جاتا ہے) پر دہائیوں سے شدید سیاسی اور علاقائی تنازع چل رہا ہے، اور 1982 میں دونوں ممالک کے درمیان اس معاملے پر باقاعدہ جنگ بھی ہو چکی ہے۔ فیفا کے اسٹیڈیم کوڈ آف کنڈکٹ اور قوانین کے مطابق کسی بھی قسم کے سیاسی، مذہبی یا نسلی پیغامات، نعرے اور بینرز لہرانے پر سخت پابندی عائد ہے۔ ارجنٹائن کی اس حرکت کے بعد فیفا کی جانب سے ان کے خلاف سخت تادیبی کارروائی اور بھاری جرمانے کا قوی امکان ظاہر کیا جا رہا ہے، جبکہ دوسری جانب ارجنٹائن کی نائب صدر وکٹوریہ ولاروئیل نے اس اقدام کی حمایت کرتے ہوئے سوشل میڈیا پر لکھا کہ “فاک لینڈ ارجنٹائن کا ہے، وہ اسٹیڈیم میں اس پر پابندی لگا سکتے ہیں لیکن یہ ہمارے خون میں شامل ہے۔”