گیانا میں ہونیوالی گلوبل سپر لیگ کیلئے لاہور قلندرز کی ٹیم کا اعلان

گیانا میں شیڈولڈ گلوبل سپر لیگ (GSL) کے لیے پاکستان سپر لیگ (PSL) کی معروف فرنچائز لاہور قلندرز نے اپنے اسکواڈ کا باضابطہ اعلان کر دیا ہے۔ لاہور قلندرز کے چیف ایگزیکٹو آفیسر (CEO) عاطف رانا نے ایک پریس کانفرنس کے دوران اسکواڈ اور نئے ہیڈ کوچ کے ناموں کا اعلان کیا۔ عاطف رانا کے مطابق، گلوبل سپر لیگ میں لاہور قلندرز کی قیادت نیوزی لینڈ کے تجربہ کار آل راؤنڈر مائیکل بریسویل کریں گے۔ اسکواڈ میں عبداللہ شفیق، اسامہ میر، پرویز حسین، شایان جہانگیر، ڈیلانو پوٹگیر، شامل حسین، محمد نعیم، عمران رندھاوا، مہران ممتاز، فرحان یوسف، شہاب خان، محمد باسط اور علی شبیر شامل ہیں۔

لاہور قلندرز نے اس اہم ٹورنامنٹ کے لیے آسٹریلیا کے سابق برق رفتار فاسٹ بولر شان ٹیٹ کو ٹیم کا ہیڈ کوچ مقرر کیا ہے۔ پریس کانفرنس سے خطاب کرتے ہوئے عاطف رانا کا کہنا تھا کہ شان ٹیٹ دنیائے کرکٹ کا وسیع تجربہ رکھتے ہیں اور ان کا مائنڈ سیٹ ہمیشہ میچ جیتنے پر مرکوز رہتا ہے، جو ٹیم کے لیے انتہائی سودمند ثابت ہوگا۔ انہوں نے مزید کہا کہ قلندرز کا موجودہ اسکواڈ نوجوان اور تجربہ کار کھلاڑیوں کا بہترین امتزاج ہے، اور اس عالمی لیگ کے ذریعے ہمارے نوجوان کھلاڑیوں کو بہترین انٹرنیشنل ایکسپوژر ملے گا اور انہیں بہت کچھ سیکھنے کا موقع ملے گا۔

واضح رہے کہ گلوبل سپر لیگ کا میلہ 23 جولائی سے یکم اگست تک گیانا میں سجے گا، جس میں دنیا کی مختلف ٹیمیں مدمقابل ہوں گی۔ لاہور قلندرز اس ٹورنامنٹ میں اپنی مہم کا آغاز 23 جولائی کو آسٹریلوی ٹیم پرتھ اسکارچرز کے خلاف پہلے میچ سے کرے گی۔