ہیڈ کوچ سرفراز احمد کا سابق کپتان شان مسعود پر بھرپور اطمینان کا اظہار

پاکستان ٹیسٹ کرکٹ ٹیم کے ہیڈ کوچ سرفراز احمد نے سابق کپتان شان مسعود کی بھرپور حمایت کرتے ہوئے کہا ہے کہ کپتانی سے ہٹنے کے باوجود وہ ٹیم کے لیے ایک اہم اور مؤثر کھلاڑی کے طور پر اپنا کردار جاری رکھیں گے۔ ویسٹ انڈیز روانگی سے قبل میڈیا سے گفتگو کرتے ہوئے ہیڈ کوچ نے بتایا کہ ان کی شان مسعود سے تفصیلی بات چیت ہوئی ہے، وہ معمولی ہیم اسٹرنگ انجری کے باوجود پُراعتماد ہیں اور ان کا رویہ انتہائی پیشہ ورانہ رہا ہے۔ حالیہ خراب نتائج کا اعتراف کرتے ہوئے سرفراز احمد نے کہا کہ کھلاڑیوں سے انفرادی ملاقاتیں کر کے توقعات واضح کر دی گئی ہیں۔ انہوں نے بابر اعظم کو دوبارہ ٹیسٹ کپتان بننے پر مبارکباد دی اور انہیں ایک باصلاحیت و تجربہ کار قائد قرار دیا۔ دورے کی تیاریوں کے حوالے سے ان کا کہنا تھا کہ ٹیم نے ویسٹ انڈیز کے گرم اور مرطوب موسم کو مدنظر رکھتے ہوئے لاہور اور راولپنڈی میں سخت تربیتی کیمپوں کے دوران گرین پچز اور اسپن ٹریکس پر بھرپور پریکٹس کی ہے، جبکہ ٹرینیڈاڈ میں شیڈول چار روزہ وارم اپ میچ کھلاڑیوں کو مقامی حالات سے ہم آہنگ ہونے میں مزید مدد دے گا۔