میٹا نے متنازع اے آئی فیچر واپس لے لیا

ٹیکنالوجی کمپنی میٹا نے شدید عوامی تنقید اور صارفین کی رازداری (Privacy) سے متعلق بڑھتے ہوئے خدشات کے بعد اپنے متنازع اے آئی تصویر سازی کے فیچر ‘میوز امیج’ (Muse Image) کو متعارف کرائے جانے کے چند ہی روز بعد واپس لے لیا ہے۔ یہ فیچر گزشتہ ہفتے انسٹاگرام اور فیس بک کی مالک کمپنی میٹا نے اپنے اسسٹنٹ ‘میٹا اے آئی’ کے ذریعے پیش کیا تھا، جو صارفین کے لیے دستیاب کمپنی کا پہلا امیج جنریشن ماڈل تھا۔ دیگر اے آئی ٹولز کے برعکس، میوز امیج کی خاص بات یہ تھی کہ یہ پبلک انسٹاگرام اکاؤنٹس پر موجود تصاویر کو بطورِ حوالہ استعمال کر کے نئی تصاویر تیار کرتا تھا، جس پر صارفین نے اپنی ذاتی معلومات اور ڈیٹا کے تحفظ کے حوالے سے شدید احتجاج کیا۔ اس شدید ردعمل کے بعد میٹا نے فیچر کو فوری بند کرنے کا اعلان کرتے ہوئے اعتراف کیا کہ یہ ٹول صارفین کی توقعات پر پورا نہیں اتر سکا، تاہم کمپنی کا مقصد ایک مفید تخلیقی ٹول فراہم کرنا اور صارفین کو اپنے عوامی مواد کے استعمال کا اختیار دینا تھا۔