سام سانگ کا زیڈ فلِپ سیریز بند کرنے پر غور

سام سنگ ٹیکنالوجی کے حوالے سے معتبر معلومات فراہم کرنے والے معروف ٹِپسٹر ‘آئس یونیورس’ نے دعویٰ کیا ہے کہ اسمارٹ فون بنانے والی دنیا کی بڑی کمپنی سام سنگ اپنی مقبولِ عام ‘گلیکسی زیڈ فلپ’ (Galaxy Z Flip) فولڈ ایبل اسمارٹ فون سیریز کو بند کرنے پر غور کر رہی ہے۔ رپورٹ کے مطابق ممکنہ طور پر ‘گلیکسی زیڈ فلپ 8’ اس سیریز کا آخری ماڈل ہو سکتا ہے۔ اس فیصلے کی بڑی وجہ رَیم (RAM) اور دیگر اندرونی پرزہ جات کی بڑھتی ہوئی لاگت بتائی جا رہی ہے، جس کے باعث کلیم شیل (فلپ اسٹائل) فونز کا منافع کم ہو رہا ہے۔ حال ہی میں موٹرولا نے بھی اپنے ریزر 70 اور 70 الٹرا کی قیمتوں میں اضافے کی وجہ مہنگے پرزوں کو قرار دیا تھا۔ واضح رہے کہ اوپو، شیاؤمی، ویوو اور آنر جیسی چینی کمپنیاں پہلے ہی مغربی ممالک میں فلپ فونز کی فروخت بند کر چکی ہیں یا انہیں چین تک محدود کر دیا ہے، جس کے بعد اب عالمی مارکیٹ میں صرف سام سنگ اور موٹرولا ہی اس ریس میں باقی ہیں۔ تاہم، ماہرین کا کہنا ہے کہ یہ اطلاعات فی الحال غیر مصدقہ افواہوں پر مبنی ہیں اور یہ بھی ممکن ہے کہ سام سنگ اس سیریز کو مستقل بند کرنے کے بجائے گلیکسی زیڈ فلپ 8 کے بعد اس کی پروڈکشن عارضی طور پر روک دے۔