گوگل کا اینڈرائیڈ صارفین کیلئے اہم فیچر پر کام جاری!

ٹیکنالوجی کمپنی گوگل اینڈرائیڈ صارفین کے لیے ایک ایسے انقلابی فیچر پر کام کر رہی ہے، جس کی مدد سے فون کا ڈیٹا کلاؤڈ اسٹوریج کے بغیر، براہِ راست ونڈوز کمپیوٹر (PC) پر خودکار طور پر بیک اپ ہو سکے گا۔ ایک نئی رپورٹ کے مطابق، گوگل پلے سروسز کے تازہ ترین ورژن میں اس خفیہ فیچر کا معلوماتی صفحہ دریافت ہوا ہے۔ یہ بیک اپ وائی فائی (Wi-Fi) کے ذریعے اس وقت خودکار طریقے سے کام کرے گا جب اینڈرائیڈ فون اور ونڈوز کمپیوٹر ایک ہی نیٹ ورک سے منسلک ہوں گے۔ اس سہولت کو استعمال کرنے کے لیے صارفین کو کمپیوٹر پر ‘کوئیک شیئر’ (Quick Share) ایپ فعال کرنی ہوگی اور دونوں ڈیوائسز پر ایک ہی گوگل اکاؤنٹ سے لاگ ان ہونا پڑے گا، جس کے بعد وہ اپنی پسند کی تصاویر اور ویڈیوز کا خودکار بیک اپ پی سی پر محفوظ کر سکیں گے۔ دلچسپ بات یہ ہے کہ اس فیچر میں فی الحال سام سنگ فونز کو شامل نہیں کیا گیا، جس کی وجہ سام سنگ کی اپنی ‘اسمارٹ سوئچ’ ایپ کو قرار دیا جا رہا ہے جو پہلے ہی بیک اپ کی سہولیات فراہم کرتی ہے۔ اگرچہ گوگل نے اس کا باضابطہ اعلان نہیں کیا، تاہم توقع ہے کہ سام سنگ کے علاوہ یہ فیچر دیگر تمام اینڈرائیڈ اسمارٹ فونز کے لیے جلد دستیاب ہوگا۔