ایران میں حالیہ امریکی حملوں میں شہدا کی تعداد 24 ہوگئی

ایران پر ہونے والے حالیہ امریکی حملوں کے نتیجے میں جاں بحق ہونے والے افراد کی مجموعی تعداد بڑھ کر 24 ہو گئی ہے، جبکہ مختلف مقامات پر ہونے والے ان حملوں میں متعدد افراد زخمی بھی ہوئے ہیں۔ ایرانی میڈیا کی رپورٹ کے مطابق، آج ہونے والے تازہ ترین امریکی حملوں میں مزید 4 افراد جاں بحق اور 7 زخمی ہوئے۔ تفصیلات کے مطابق، ایرانی شہر آبادان میں امریکی میزائل حملوں کے نتیجے میں 2 افراد جاں بحق جبکہ 3 زخمی ہوئے۔

رپورٹ میں مزید بتایا گیا ہے کہ ایرانی شہر نائین کے ایک فوجی اڈے پر امریکی حملے کے نتیجے میں ایک شخص جاں بحق ہوا، جبکہ ماہ شہر میں ایک پبلک واٹر پمپنگ اسٹیشن کو نشانہ بنائے جانے کے باعث ایک شخص جاں بحق اور 4 افراد زخمی ہو گئے۔ ایرانی میڈیا کا کہنا ہے کہ ان پے در پے فضائی و میزائل حملوں کے بعد اب تک جاں بحق ہونے والے شہریوں اور اہلکاروں کی کل تعداد 24 تک جا پہنچی ہے، جبکہ متاثرہ علاقوں سے مزید جانی و مالی نقصانات کی تفصیلی معلومات سامنے آنے کا سلسلہ تاحال جاری ہے۔