پاکستان اور سعودی عرب کا توانائی تعاون بڑھانے پر اتفاق

وفاقی وزیر توانائی سردار اویس احمد خان لغاری کی قیادت میں پاکستانی پاور سیکٹر کے اعلیٰ سطحی وفد نے سعودی عرب کے دارالحکومت ریاض میں سعودی انرجی ورکنگ گروپ سے ایک انتہائی اہم ملاقات کی ہے۔ ملاقات کے دوران پاکستان اور سعودی عرب کے مابین توانائی کے شعبے میں دوطرفہ تعاون کو مزید وسعت دینے، دونوں ممالک کے دیرینہ اور برادرانہ تعلقات کو مزید مضبوط بنانے اور باہمی اقتصادی شراکت داری کے فروغ پر تفصیلی تبادلہ خیال کیا گیا۔ وفاقی وزیر نے سعودی وفد کو پاکستان کے پاور سیکٹر میں جاری جامع اصلاحاتی پروگرام پر بریفنگ دیتے ہوئے واضح کیا کہ حکومت اس وقت ادارہ جاتی اصلاحات، بہتر طرزِ حکمرانی (Good Governance)، ڈیجیٹلائزیشن اور مالیاتی پائیداری کے ایجنڈے پر بھرپور طریقے سے عمل پیرا ہے۔

سردار اویس لغاری نے اس موقع پر گفتگو کرتے ہوئے کہا کہ حکومتِ پاکستان نجی شعبے کی مؤثر شمولیت اور غیر ملکی سرمایہ کاری کے فروغ کے لیے انتہائی سازگار ماحول فراہم کر رہی ہے۔ انہوں نے اس بات پر زور دیا کہ بجلی کی بڑھتی ہوئی طلب اور صاف توانائی (Clean Energy) کے مؤثر انضمام کے لیے قومی ٹرانسمیشن گرڈ کی توسیع ناگزیر ہے، کیونکہ جدید ٹرانسمیشن انفراسٹرکچر ہی پاکستان کے محفوظ توانائی مستقبل کی بنیادی ضرورت ہے۔ ملاقات میں پاور سیکٹر کی ڈیجیٹلائزیشن پر بات کرتے ہوئے سعودی وفد کو سمارٹ میٹرنگ اور ایڈوانسڈ میٹرنگ انفراسٹرکچر کے نفاذ پر تفصیلی بریفنگ دی گئی۔ وفاقی وزیر کا کہنا تھا کہ اسمارٹ میٹرنگ کی مدد سے بجلی کے تکنیکی و تجارتی نقصانات (Line Losses) میں واضع کمی آئے گی اور صارفین کو زیادہ شفاف اور معیاری خدمات کی فراہمی ممکن ہو سکے گی۔ انہوں نے سعودی انرجی ورکنگ گروپ کو پاکستان کے دورے کی باضابطہ دعوت دی تاکہ وہ یہاں جاری اصلاحات اور ترجیحی منصوبوں کا خود جائزہ لے سکیں، اور یقین دلایا کہ حکومت پاکستان سعودی سرمایہ کاروں کو ہر ممکن سہولت اور تعاون فراہم کرے گی۔ دونوں ممالک نے توانائی، سرمایہ کاری اور جدید ٹیکنالوجی کے شعبوں میں تعاون کو مزید بڑھانے کے عزم کا اعادہ کیا۔