کوئٹہ اور نوشکی میں فائرنگ سے قبائلی رہنما سمیت 3 افراد جاں بحق

بلوچستان کے صوبائی دارالحکومت کوئٹہ اور ضلع نوشکی میں فائرنگ کے دو مختلف اور افسوسناک واقعات میں قبائلی رہنما اور سیاسی کونسلر سمیت تین افراد جاں بحق ہو گئے۔ پہلے واقعے میں کوئٹہ کے نواحی علاقے مغربی بائی پاس کے قریب اختر آباد میں نامعلوم مسلح افراد نے اندھا دھند فائرنگ کر کے عارف مینگل نامی شخص کو موت کے گھاٹ اتار دیا۔ بلوچستان نیشنل پارٹی (بی این پی) کے ترجمان غلام نبی مری نے واقعے کی تصدیق کرتے ہوئے بتایا کہ جاں بحق ہونے والے عارف مینگل بی این پی کے ضلعی کونسلر اور پارٹی کے سینئر رہنما لالہ غفار مینگل کے سگے بھائی تھے۔ وہ مغربی بائی پاس سے اپنے گھر کی طرف جا رہے تھے کہ گھات لگائے بیٹھے مسلح ملزمان نے ان پر قاتلانہ حملہ کیا۔

دوسری جانب، نوشکی میں پیش آنے والے دوسرے خونی واقعے میں نامعلوم افراد کی فائرنگ سے ممتاز قبائلی رہنما میر طارق بادینی اپنے ایک ساتھی سمیت شدید زخمی ہو گئے۔ دونوں زخمیوں کو انتہائی تشویشناک حالت میں قریبی ہسپتال منتقل کیا جا رہا تھا لیکن زخموں کی تاب نہ لاتے ہوئے وہ ہسپتال پہنچنے سے پہلے ہی راستے میں دم توڑ گئے۔ دونوں مقامات پر وارداتوں کے بعد حملہ آور اسلحہ لہراتے ہوئے فرار ہونے میں کامیاب ہو گئے، جن کی گرفتاری کے لیے پولیس اور سیکیورٹی اداروں نے ناکہ بندی کر کے علاقے میں سرچ آپریشن اور تحقیقات کا آغاز کر دیا ہے