دنیا کی پہلی علامتی ’’اے آئی روبوٹ شادی‘‘، انسان نما روبوٹس نے سب کو حیران کر دیا

روس کے دارالحکومت ماسکو میں مصنوعی ذہانت (AI) کی دنیا سے جڑا ایک انتہائی انوکھا اور غیر معمولی واقعہ پیش آیا ہے، جہاں تاریخ میں پہلی مرتبہ دو انسان نما (ہیومنائیڈ) اے آئی روبوٹس کی علامتی شادی کی تقریب منعقد کی گئی۔ ماسکو کی تاریخی پشکن لائبریری میں ہونے والی اس منفرد تقریب میں ’’رابرٹ‘‘ اور ’’ماٹلڈا‘‘ نامی روبوٹس کو علامتی طور پر ایک دوسرے کا شریکِ حیات قرار دیا گیا۔ ماریا پینٹیوخینا کی میزبانی میں ہونے والی اس شادی میں دونوں روبوٹس نے روایتی انداز میں ایک دوسرے کے ساتھ زندگی گزارنے کے علامتی عہد کیے اور یادگار کے طور پر بریسلیٹس بھی پہنائے۔ روسی سرکاری خبر رساں ادارے ‘ریا نووستی’ کے مطابق، ملک میں اس نوعیت کا یہ پہلا تجربہ ہے جہاں رابرٹ کو ایک دفتری ملازم و بلاگر اور ماٹلڈا کو ایک بیلرینا (رقاصہ) کی شخصیت کے طور پر ڈیزائن کیا گیا ہے۔ اس سے قبل ان روبوٹس کو سینٹ پیٹرزبرگ انٹرنیشنل اکنامک فورم میں بھی پیش کیا جا چکا ہے، اور اب ان کی علامتی شادی کی ویڈیوز انٹرنیٹ پر وائرل ہونے کے بعد روبوٹکس کے ماہرین اسے اے آئی کی تخلیقی اور نمائشی صلاحیتوں کا ایک منفرد شاہکار قرار دے رہے ہیں۔