امریکا میں پہلی بار الیکٹرک ایئر ٹیکسی کے آزمائشی آپریشن کا آغاز

امریکا میں مستقبل کی فضائی ٹرانسپورٹیشن کی جانب ایک انقلابی پیشرفت کرتے ہوئے پہلی الیکٹرک ایئر ٹیکسی کے آزمائشی آپریشنز کا کامیابی سے آغاز کر دیا گیا ہے۔ فیڈرل ایوی ایشن ایڈمنسٹریشن (FAA) اور امریکی محکمہ ٹرانسپورٹ کے ‘الیکٹرک ورٹیکل ٹیک آف اینڈ لینڈنگ’ (eVTOL) انٹیگریشن پائلٹ پروگرام کے تحت ابتدائی پروازوں میں مریضوں کے لیے تیار کیے گئے انسانی اعضا میری لینڈ اور ورجینیا کے ہوائی اڈوں کے درمیان منتقل کیے گئے۔ ایمیزون کی حمایت یافتہ کمپنی ‘بیٹا ٹیکنالوجیز’ نے اس کثیر سالہ پروگرام کے تحت تقریباً 275 ناٹیکل میل کا سفر طے کر کے یہ مشن مکمل کیا۔ کمپنی کے چیف ایگزیکٹو آفیسر کائل کلارک کا کہنا ہے کہ ان کامیاب پروازوں سے ملک بھر میں کم لاگت پر طبی مقاصد کے لیے برقی فضائی نقل و حمل کی راہ ہموار ہوگی۔ رپورٹ کے مطابق، صدر ڈونلڈ ٹرمپ کے گزشتہ سال جاری کردہ ایگزیکٹو آرڈر کے تحت اس پروگرام کو تیز کیا گیا ہے تاکہ ریگولیٹری منظوریوں کے عمل کو جلد مکمل کیا جا سکے۔ بیٹا ٹیکنالوجیز کو امید ہے کہ ان کا روایتی رن وے والا برقی طیارہ 2027ء اور عمودی اڑان بھرنے والی ایئر ٹیکسی 2028ء تک باقاعدہ سرٹیفکیشن حاصل کر لے گی۔