10 منٹ میں 66 ہاٹ ڈاگ کھا کر امریکی شہری 18ویں مرتبہ چیمپئن بن گیا

امریکا کے یومِ آزادی کے موقع پر نیویارک میں منعقد ہونے والے روایتی ہاٹ ڈاگ کھانے کے تاریخی مقابلے میں نامور مقابلہ باز جوئی چیسٹنٹ اور میکی سودو نے اپنی برتری برقرار رکھتے ہوئے بالترتیب مردوں اور خواتین کے ٹائٹلز اپنے نام کر لیے ہیں۔ بین الاقوامی میڈیا رپورٹس کے مطابق، جوئی چیسٹنٹ نے صرف 10 منٹ میں 66 ہاٹ ڈاگ کھا کر 18ویں مرتبہ یہ مقابلہ جیتا، جس پر انہیں 10 ہزار امریکی ڈالر اور روایتی یلو بیلٹ کا انعام دیا گیا۔ چیسٹنٹ نے فتح کے بعد کہا کہ شدید گرمی کی وجہ سے وہ اپنے 76 ہاٹ ڈاگ کھانے کے عالمی ریکارڈ کو توڑ نہیں سکے۔ مقابلے میں پیٹرک برٹولیٹی 51 ہاٹ ڈاگ کھا کر دوسرے نمبر پر رہے۔ دوسری جانب، خواتین کے مقابلے میں میکی سودو نے مسلسل 12ویں بار میدان مارتے ہوئے 38.75 ہاٹ ڈاگ کھا کر کامیابی حاصل کی؛ واضح رہے کہ خواتین کا عالمی ریکارڈ (51 ہاٹ ڈاگ) بھی انہی کے نام ہے۔ یہ مقبول ترین روایتی مقابلہ 1972ء سے ہر سال 4 جولائی کو نیویارک کے ایک معروف ریسٹورنٹ کے باہر منعقد کیا جاتا ہے۔