خاتون نے اپنی ہاؤس میٹ کے ہونٹ سی دیے

جاپان کے مشرقی صوبے ایباراکی کے شہر کوگا میں پولیس نے ایک ہولناک واقعے میں ملوث 49 سالہ خاتون کو اپنی ہاؤس میٹ کے ہونٹ سوئی اور دھاگے سے سی دینے کے الزام میں گرفتار کر لیا ہے۔ جاپانی پولیس کے مطابق یہ سفاکانہ واقعہ 29 جون کو پیش آیا، جہاں ملزمہ ماسائے ساکورائی اور ان کی 42 سالہ ہاؤس میٹ کے درمیان کسی بات پر جھگڑا ہوا، جس پر ملزمہ نے طیش میں آ کر متاثرہ خاتون کے ہونٹ سوئی دھاگے سے سی دیے۔ واقعے کے فوراً بعد زخمی خاتون کسی طرح گھر سے فرار ہونے میں کامیاب ہوئیں اور قریبی دکان پر پہنچ کر ایک کاغذ پر “براہِ کرم میری مدد کریں” لکھ کر لوگوں کو دکھایا، جس پر دکان دار نے پولیس کو اطلاع دی۔ جاپانی سرکاری نشریاتی ادارے این ایچ کے (NHK) کے مطابق پولیس نے ملزمہ کو اقدامِ قتل اور وحشیانہ حملے کے شبہے میں حراست میں لے کر واقعے کی باقاعدہ تحقیقات کا آغاز کر دیا ہے۔