کامن ویلتھ گیمز کے لیے 36 رکنی پاکستانی دستے کا اعلان؛ ارشد ندیم سمیت نامور کھلاڑی ایکشن میں نظر آئیں گے

کامن ویلتھ گیمز کے لیے پاکستان کے 36 رکنی کھلاڑیوں اور آفیشلز پر مشتمل دستے کا اعلان کر دیا گیا ہے، جس کے چیف ڈی مشن میجر جنرل عادل رحمانی ہوں گے۔ ایونٹ میں پاکستانی ایتھلیٹس باکسنگ، ایتھلیٹکس، سوئمنگ، جمناسٹکس، جوڈو اور لان بال کے مقابلوں میں ملک کی نمائندگی کریں گے۔ اہم ترین مقابلوں کے لیے ایتھلیٹکس میں نامور سٹار ارشد ندیم سمیت فائقہ ریاض، انصر عباس، محمد اختر، محمد اسماعیل، محمد یاسر اور نورین حسین ایکشن میں نظر آئیں گے۔ باکسنگ کے میدان میں افضل خان، فاطمہ زہرا، ملائکہ زاہد، قدرت اللہ اور سمیمہ رحمان جبکہ سوئمنگ میں حمزہ آصف، حریم ملک، جہاں آراء نبی اور محمد احمد درانی پاکستان کی جانب سے جوہر دکھائیں گے۔ اس کے علاوہ جمناسٹکس میں شہزاد علی، جوڈو میں شاہ حسین جبکہ لان بال کے مقابلوں میں مقصود وسیم خان اور محمد ایوب قریشی گرین شرٹس کی نمائندگی کریں گے۔