شیگیلا کے خلاف نئی ویکسین کے حوصلہ افزا نتائج

شیگیلا بیکٹیریا سے ہونے والی آنتوں کی خطرناک بیماری کے خلاف تیار کی جانے والی ایک نئی تجرباتی اورل (زبانی) ویکسین نے فیز ٹو کلینیکل ٹرائلز میں 89 فیصد مؤثر کارکردگی دِکھا کر طبی دنیا میں نئی امید پیدا کر دی ہے۔ معروف برطانوی طبی جریدے “دی لانسیٹ انفیکشیس ڈیزیزز” میں شائع ہونے والی تحقیق کے مطابق، امریکہ کے دو طبی مراکز میں 18 سے 49 سال کے 73 صحت مند افراد پر اس ویکسین کی آزمائش کی گئی۔ ‘ڈبلیو آر ایس 2’ (WRS2) نامی یہ زندہ لیکن کمزور کی گئی ویکسین شیگیلا سونئی کے خلاف تیار کی گئی ہے، جو دنیا بھر میں کروڑوں افراد میں شدید اسہال اور قے کا باعث بنتی ہے۔ ٹرائل کے دوران ویکسین کی دو خوراکیں لینے والے 34 افراد میں سے صرف 9 فیصد بیمار ہوئے، جبکہ پلیسبو لینے والے 81 فیصد افراد میں بیماری کی تشخیص ہوئی۔ ماہرین کا کہنا ہے کہ شیگیلا کی بعض اقسام فرسٹ لائن اینٹی بائیوٹکس کے خلاف تیزی سے مزاحمت پیدا کر رہی ہیں اور اس وقت مارکیٹ میں کوئی منظور شدہ ویکسین موجود نہیں، ایسے میں یہ نتائج ایک بڑی پیشرفت ہیں۔ تحقیق کے سربراہ رابرٹ ڈبلیو فرینک جونیئر کے مطابق، اگلے مرحلے میں خوراک کا تعین کر کے افریقہ جیسے شدید متاثرہ علاقوں میں بچوں پر اس کے بڑے پیمانے پر ٹرائلز کیے جائیں گے۔