پاکستان ٹیسٹ کے کھلاڑی آج اسلام آباد میں اکٹھے ہوں گے

پاکستان ٹیسٹ کرکٹ ٹیم کے اراکین دورہ ویسٹ انڈیز اور انگلینڈ کے خلاف اہم سیریز کی تیاریوں کے سلسلے میں آج اسلام آباد میں سر جوڑیں گے، جہاں وہ کل سے باقاعدہ ٹریننگ کا آغاز کریں گے۔ پی سی بی کے شیڈول کے مطابق، 16 رکنی قومی ٹیسٹ اسکواڈ 13 جولائی کو ویسٹ انڈیز کے لیے روانہ ہوگا، جہاں سیریز سے قبل 18 جولائی سے ایک چار روزہ پریکٹس میچ کھیلا جائے گا۔ پاکستان اور ویسٹ انڈیز کے درمیان پہلا ٹیسٹ میچ 25 جولائی اور دوسرا 2 اگست سے شروع ہوگا۔ دورہ ویسٹ انڈیز کے فوراً بعد قومی ٹیم تین ٹیسٹ میچوں کی سیریز کے لیے انگلینڈ پہنچے گی، جہاں انگلش ٹیم کے خلاف میچز بالترتیب 19 اگست، 27 اگست اور 9 ستمبر سے کھیلے جائیں گے۔ واضح رہے کہ اتوار کو بابر اعظم کی قیادت میں سولہ رکنی اسکواڈ کا اعلان کیا گیا تھا، جس میں شان مسعود، امام الحق، اذان اویس، عبداللہ فضل، سلمان علی آغا، غازی غوری، محمد رضوان، ساجد خان، علی عثمان، عامر جمال، محمد علی، محمد عباس، عبید شاہ، اویس ظفر اور خرم شہزاد شامل ہیں