میکسیکو: خاتون میئر کے اغوا کا ڈرامہ بے نقاب، مالیاتی سکینڈل میں تبدیل

میکسیکو میں ایک خاتون میئر کے مبینہ اغوا کا سنسنی خیز واقعہ پولیس تحقیقات کے بعد ایک بڑے مالیاتی اور سیاسی اسکینڈل میں تبدیل ہو گیا ہے۔ تفتیشی حکام کے مطابق، ٹینینسِنگو کی میئر نینسی نیپولیز اور ان کی بہن کے مئی میں ہونے والے اس اغوا کا ڈراما مبینہ طور پر بلدیاتی فنڈز میں خردبرد کو چھپانے کے لیے رچایا گیا تھا۔ خاتون میئر نے ابتدائی بیان میں دعویٰ کیا تھا کہ مسلح اغوا کاروں نے بلدیاتی کونسل کے فنڈز سے 4 کروڑ پیسو تاوان ادا کرنے کا کہا تھا اور وہ چکمہ دے کر فرار ہوئیں۔ تاہم، کئی ماہ کی تفتیش اور گرفتار ملزمان کے اعترافِ جرم سے انکشاف ہوا کہ اس اغوا کی منصوبہ بندی خود خاتون میئر کے شوہر اور بھائی نے کی تھی تاکہ سرکاری خزانے سے خطیر رقم ہڑپ کرنے کا جواز پیدا کیا جا سکے۔ پولیس نے بتایا کہ دونوں مفرور ملزمان نے واردات سے قبل اغوا کاروں سے 150 سے زائد مرتبہ رابطہ کیا اور شوہر کی 28 ہزار ڈالر کی پیشکش کی آڈیو ریکارڈنگ بھی ملی ہے۔ کیس کی مزید تفتیش جاری ہے اور عدالت کی جانب سے حتمی فیصلے کا انتظار ہے۔