فولڈ ایبل آئی فون لانچ سے متعلق بڑی خبر!

ٹیکنالوجی کمپنی ایپل کے طویل عرصے سے زیرِ گردش پہلے فولڈ ایبل آئی فون کی لانچ میں سپلائی چین کے مسائل کے باعث تاخیر کا امکان ظاہر کیا جا رہا ہے۔ غیر ملکی میڈیا رپورٹس کے مطابق، ایپل رواں سال ستمبر میں اپنے اس انوکھے فولڈ ایبل آئی فون کی رونمائی کر سکتا ہے، تاہم محدود پیداوار کی وجہ سے بیشتر صارفین کو یہ ڈیوائس 2027 تک دستیاب نہ ہونے کا خدشہ ہے۔ رپورٹس میں دعویٰ کیا گیا ہے کہ ممکنہ طور پر ‘آئی فون الٹرا’ کے نام سے متعارف کرائے جانے والے اس فون میں 5.5 انچ کی بیرونی اسکرین اور فولڈ کھولنے پر 7.8 انچ کی بڑی ڈسپلے ہوگی۔ معروف صنعتی تجزیہ کار منگ چی کوو کا کہنا ہے کہ فولڈ ایبل آئی فون کی صورتحال 2017 کے آئی فون ایکس جیسی ہو سکتی ہے، جس کا اعلان ستمبر میں کر دیا جائے گا لیکن پری آرڈر بکنگ اور فروخت کچھ عرصے بعد شروع ہوگی۔ ذرائع کے مطابق، اس فون کی متوقع قیمت 2300 سے 2500 امریکی ڈالر کے درمیان ہوگی، جس کے بعد یہ ایپل کی تاریخ کا مہنگا ترین آئی فون بن جائے گا۔