گوجرانوالہ میں 10 سالہ بچے کو بے دردی سے قتل کر دیا گیا

گوجرانوالہ کے تھانہ واہنڈو کے علاقے میں انسانیت سوز واقعہ سامنے آیا ہے، جہاں نامعلوم سفاک ملزمان نے 10 سالہ معصوم بچے کو انتہائی بزدلانہ اور بے دردی کے طریقے سے موت کے گھاٹ اتار دیا۔

پولیس حکام کے مطابق، مقتول بچے کی شناخت 10 سالہ شعیب کے نام سے ہوئی ہے۔ نامعلوم ملزمان نے معصوم بچے پر تیز دھار آلے سے حملہ کرتے ہوئے اس کا پیٹ چاک کر دیا، جس کے باعث بچے کی آنتڑیاں باہر آگئیں اور وہ تڑپ تڑپ کر دم توڑ گیا۔ ملزمان بچے کی لاش کو سیج کالر گورنمنٹ اسکول کے قریب پھینک کر فرار ہو گئے۔

واقعے کی اطلاع ملتے ہی پولیس کے اعلیٰ حکام بھاری نفری اور امدادی ٹیموں کے ہمراہ فوری طور پر جائے وقوعہ پر پہنچ گئے۔ پولیس نے امدادی ٹیموں کی مدد سے بچے کی مسخ شدہ لاش کو قبضے میں لے کر پوسٹ مارٹم اور ضروری قانونی کارروائی کے لیے ہسپتال منتقل کر دیا۔

پولیس حکام کا کہنا ہے کہ واقعے کی مختلف پہلوؤں سے تحقیقات کا آغاز کر دیا گیا ہے۔ ملزمان کی فوری گرفتاری اور سراغ لگانے کے لیے خصوصی پولیس ٹیمیں تشکیل دے دی گئی ہیں جو مختلف مقامات پر چھاپے مار رہی ہیں۔ حکام نے عزم ظاہر کیا ہے کہ معصوم بچے کو اس قدر درندگی سے قتل کرنے والے قانون کی گرفت سے بچ نہیں سکیں گے، ان کے ساتھ کسی قسم کی کوئی رعایت نہیں برتی جائے گی اور انہیں جلد از جلد گرفتار کر کے کیفرِ کردار تک پہنچایا جائے گا۔