اسلام آباد بلدیاتی انتخابات کیس؛ الیکشن کمیشن کا چیف کمشنر کو سمری فالو کرنے کا حکم، وفاقی حکومت کو 2 ہفتوں کی مہلت

الیکشن کمیشن آف پاکستان میں اسلام آباد بلدیاتی انتخابات سے متعلق کیس کی سماعت ممبر سندھ نثار درانی کی سربراہی میں 4 رکنی کمیشن نے کی۔ دورانِ سماعت اسپیشل سیکریٹری ظفر اقبال نے بتایا کہ وزارتِ داخلہ نے یکم جولائی کو ٹاؤن کارپوریشنز کی حدود اور یونین کونسلز کی تعداد کے حوالے سے ایک سمری وزیرِ اعظم کو بھجوائی تھی، جسے انہوں نے وزارتِ قانون کو ارسال کر دیا ہے۔ چیف کمشنر اسلام آباد نے کمیشن کو آگاہ کیا کہ وزیرِ اعظم نے سمری کی منظوری دے دی ہے اور اب وزارتِ قانون کی توثیق کے بعد وفاقی کابینہ اس کی حتمی منظوری دے گی۔ کمیشن کی جانب سے ٹائم لائنز کے استفسار پر الیکشن کمیشن نے چیف کمشنر کو سمری فالو کرنے کی ہدایت کرتے ہوئے وفاقی حکومت کو دو ہفتوں کی مہلت دے دی۔ الیکشن کمیشن نے حکم دیا کہ دو ہفتوں کے اندر سمری کی منظوری لے کر رپورٹ جمع کرائی جائے، جس کے بعد کیس کی مزید سماعت 28 جولائی تک ملتوی کر دی گئی۔