دنیا پور: تیز رفتار کار خوفناک حادثے کا شکار، ایک نوجوان جاں بحق، 4 شدید زخمی

قومی شاہراہ پر مخدوم عالی کے قریب ایک تیز رفتار کار خوفناک حادثے کا شکار ہو گئی، جس کے نتیجے میں ایک نوجوان موقع پر ہی جاں بحق جبکہ 4 افراد شدید زخمی ہو گئے۔

ریسکیو ذرائع کے مطابق، حادثے میں جاں بحق ہونے والے بدقسمت نوجوان کی شناخت 22 سالہ حارث مڑل کے نام سے ہوئی ہے۔ حادثے کی اطلاع ملتے ہی ریسکیو ٹیموں نے فوری کارروائی کرتے ہوئے تمام زخمیوں کو مخدوم عالی ہسپتال منتقل کیا۔ ہسپتال ذرائع کا کہنا ہے کہ زخمیوں میں سے ایک نوجوان کی حالت انتہائی تشویشناک تھی، جس کے باعث اسے ابتدائی طبی امداد کے بعد نشتر ہسپتال ملتان ریفر کر دیا گیا ہے۔

 مقامی ذرائع نے بتایا ہے کہ حادثے کا شکار ہونے والے تمام نوجوان پنیاں بنگلا کے رہائشی تھے جو کار میں سوار ہو کر جا رہے تھے۔ دوسری جانب، پولیس نے واقعے کا نوٹس لیتے ہوئے کار حادثے کی وجوہات جاننے کے لیے باقاعدہ تحقیقات کا آغاز کر دیا ہے۔